Аьралуннал дуккаврил центрданул мурадру
Дагъусттаннайсса Аьралуннал дуккаврил центрданул цалчинмур выпуск хьунтIий бур гьашину сентябрьданий.
Августрал 11-нний республикалул каялувчи Федор Щукиннул Дагъусттаннал паччахIлугърал технический университетрал ректор Назим Баламирзоевлущал цачIу ххал бивгьунни Аьралуннал дуккаврил центрданул лябуккулул масъала.
Дуккаврил центр тIивтIуссар ДГТУ-лул гьанулий 2024 шинал. Шиву студентътураща бюхълай бур агьаммур сянатрацIун лахьхьин аьралуннал ишругу. ХIакьину Центрданий дуклай ур сайки 200 инсан. Миннан хIадур дурну дур аьркинсса инфраструктура. Проект бартдигьлай бур Аьрасатнал Обороналул министерствалул ва Аьрасатнал Дуккаврил ва элмулул министерствалул кабакьулийну.Опыт бусса инструктортурал каялувшиврий студентътурал лахьлай бур ярагъ ишла буллан, талатаврил тактика, вардиш хъанай бур ишла дуллан ттизаманнул лазертаг-оборудование ва лахьлай бур БПЛА леххан дуллан.
Курсантътал гьуртту шайссар мукунма патриотшиврул давурттавухгу, региондалул акциярдавухгу, хьунабакьлай бур СВО-лул ветерантуращал ва вирттаврал кулпатирттащал.
Федор Щукиннул кIицI дунни Центрданул давурттал ларайсса сакиншинна ва ванил хъунмасса кIану бугьлагьишиву Дагъусттаннал жагьилтал тарбия бавриву.
Сентябрьданий Центрданул итабакьинтIий бур сайки ттуршаксса инсантал, миннавух – 33 сержант ва 66 луртандалул рядовойтал. Ттиния тинмай вузрал бюхъайссар хIадур буллан хIаписарталгу.
ХI. Аьдиловл