Августрал 11-нний Ма­хIачкъалалив «Дагестан» РИА-лул редакциялий хьунни Дагъусттаннайсса «Справедливая Россия» партиялул пресс-конференция.

Ванил давриву гьуртту хьунни региондалийсса партиялул отделениялул каялувчи, ДР-лул Халкьуннал Мажлисрал председательнал хъиривчу Камил Давдиев, Дагъусттаннал парламентрал депутат Марат Аьлияров, Партиялул советрал член Зурида Валиева, журналист Анвар Багиров.
Пресс-конференциялул даву дачин дуллай, Анвар Багировлул бувсунни, «Дагестан» РИА-лул редакциялий дуллалисса пенсиярттал ва харжирдал системалийн багьайсса масъаларттал хIакъиравусса пресс-конференция, августрал 4-нний Москавлив хьусса партиялул щалагу Аьрасатнал даражалийсса конференциялул агьаммур бутIану хъанахъишиву.
Цала ихтилатраву Камил Давдиевлул кIицI лавгунни, «Справедливая Россия» партиялул сукку дуллай бушиву агьалинал оьрмулул шартIру къулай даву мурадрайсса сиптарду. Бувсунни щала вихну акъашиву Дагъусттаннал агьалинал ахIвал-хIал лайкьсса даражалийсса бакъашиврий.
«Росстатрал хIасиллайн бувну, республикалул агьалинал харжру бур 52 азарда къурушрайн бивсса. Агьалинан мукунсса харжирдая баяйхту, гьай-гьай, цIуру-кIурулий бур: цумари мукунсса харжру ласлай усса, тIий? Ведомствалул сияхIрай ккаккан буллалисса харжру, агьалинал ласласиминнуцIун цалийн букIлай бакъар. Мунийн бувну, аьркинну бур агьалинал доход гьаз даву мурадрайсса сиптарду хьхьичIуннай дуллан», – увкунни Камил Давдиевлул.
Му бакъассагу, ванал мукунма кIицI лавгунни регионнал дянивсса доходиртталгу хъуннасса тапаватшиву душиву.
«Дагъусттаннай зузисса пишакартал Москавуллал, ягу цамур региондалул коллегахъаяр ялавайну зий буссар учин къабюхъанссар. Циваннив, жула агьалинал харжру цимигу даражалул ялавайсса бур цайми регионнайминнуяр. Агьалинал ихтиярду цасса дунугу, захIматралмур чулуха тIайладакъашивуртту душиву хIисав хъанай бур», – увкунни фракциялул каялувчинал.
Марат Аьлияровлул цала ихтилатраву чIурчIав дунни социал сфера хьхьичIуннай даврих къулагъас чан дуллай бушиврий ва муницIун бавхIуну экономикалунгу зарал биллай бушиврий.
«ХIакьину жунна аьркинну дур социал сфера хьхьичIуннай даву мурадрайсса экономикалул модель. МуницIун бавхIуну, лавайсса даражалул пишакарнал доходгу мунин лархьхьусса дикIан багьлай бур. ЗахIматран багьайсса куццуйсса хIакь къабулларчан, производствагу хьхьичIуннай дан къабюхъантIиссар, – увкунни Аьлияровлул.
Пресс-конференциялий «материнская зарплата» тIимур темалия балжину бувсунни Зурида Валиевал.
«Нинушиву дур 24 ссятрал мутталий бацIаву дакъа, бигьалагай кьини, больничный, отпуск цирив къакIулну зузисса пиша. Ужагърайсса нину – педагог, психолог ва хIакингу хъанахъиссар. Вай цимурцаннуцIун, ниттихъал марцI-чапалшивугу дурурччуну, ужагъгу лази-лавкьуну буссар. ХIукуматрал ниттихъал захIматран уттигу лайкьсса кьимат бивщуну бакъар. ХIатта, оьрчIах буруглалисса шиннугума пенсиялул стажравун дичлай дакъар, – увкунни Зурида Валиевал.
Пресс-конференциялий кIицI лавгсса цIурювкьусса масъалартту дузрайн буккан баву мурадрай Аьрасатнал ПаччахIлугърал Думалул хьхьичIун лавсун буссар.
Ахирданий партиялул вакилтурал жавабру дуллунни журналистътурал суаллахьхьун.
Имара Саидова