Дагъусттаннал лайкь хьусса строитель, Цалчинмур ЦIувкIратусса Шагьабуттиннул арс Сайдун ХIажикьурбанов, Совет Союзрал кIийла Виричу, СССР-данул ПаччахIлугърал премиялул лауреат, СССР-данул лайкь хьусса летчик-испытатель АхIмад-Хан Султаннул ссурахъил арс уттинингу Виричунал оьр­мулия республикалул кказитирттайн тамансса макьалартту чивчусса авторди. 

Мадарасса макьалартту дурккуссар «Илчилийгу». Сайдуннул цала буржиран ккалли бувай АхIмад-Хан Султаннул оьрмулул ххуллия уттисса никирахь бусласаву.
Вана Сайдуннул чивчуну, уттигъанну дунияллийн буккан бунни «АхIмад-Хан Султан. Совет Союзрал кIийла Виричу» тIисса лу.
Луттираву бутIрайх бавчIуну бувсуну бур Виричу шамийлагу Дагъусттаннайн увкIсса чIумуя, Дагъусттанналщалсса хIала-гьурттушиврия. Балжину бувсуну бур АхIмад-Ханнул буттал агьулдания, тухумрал къяртрая, кулпатрая. АхIмад-Ханнул буттал тухумрал къяртрал (родословная) схемагу дуллуну дур.
Уттинин укун балжину Виричунал буттал тухумрая бусласисса лу дунияллийн къабувкссар. Виричунал ттаттал буттайн бияннинсса нясаврал цIарду хьхьичIун ларсун дур. Къуруллаев Султан ур Виричунал ттаттал ппу. Ттаттал цIа дур АхIмад-Хан, хъуннабавал – Качар. Буттал цIа – Султан. ЦIардай личIину чIурчIав дуллалаврил сававгу мури, Амет къиримнал татарнал цIар тIисса хIуччарду хьхьичIун бугьлангу бикIай. АхIмад-Хан Султаннун ттаттал цIа дирзушиву мяйжан бувансса хIуччар вагу. Ттаттал, буттал цIа дизайсса аьдат тасттикь дуллалисса.
Ва оьрус мазрайсса лу бур. Уттисса никирал оьрчIан ххуйну лакку мазгу кIулну бакъахьувкун, оьрус мазрай итабакьавриву къулайшинна дур. Лаккуйсса, ЦIуссалаккуйсса дуклаки оьрчIан ххуйсса бахшишну хьунсса лу бур. Мукунма Виричунал оьрмулия мяълумну кIул буван ччинангу мюнпатну лякъинсса. Авторнал чичаврил кьяйдагу буккултран даши дизансса дур.
АхIмад-Хан Султаннун хас дурсса назмурду дур лакку мазрай. Бур лакрал машгьурсса чичу, аьлимчу Абачара ХIусайнаевлул бивкIу бакъасса шеъри «АхIмад-Хан Султан – ссавнил пагьливан» ва ЦIувкIуллал шяраваллил хьхьичIунсса арсурваврал ва душваврал шеърирдугу.
Луттирай дур Виричунал оьр­мулул лахIзардая бусласисса суратругу, мунал агьулданул, гъан-маччанал суратругу.
ЦIувкIуллалгу, цинявнналгу бусрав-барчаллагьрай кьамул дансса даву дунни Сайдун ХIажикьурбановлул. Хъунмасса умудгу бур, авторнал захIматрангу кьимат бивщуну, луттирая биялсса мюнпат ласунссар тIисса уттисса ва ялун дучIантIисса никирал.
ПатIимат Рамазанова